曹 仁 超 (23/10/2008): 春節前後將爆發裁員

2008年10月23日春節前後將爆發裁員潮曹仁超
10月22日，周三。恒生指數跌774.57，收14266.6，成交540.93億元。10月期指跌1064點，收14106點；11月期指跌1105 點，收14037點，期指倒掛現象又出現。再睇吓恒指每日乾坤燭【下圖】，前支持點（10月10日）14675點已失守，後市進一步睇淡，恐怕14000 點不保。


美元7月初至今已回升16％；兌澳元、英鎊、歐羅、加元及韓圜大幅攀升，小數跑贏美元嘅貨幣只有日圓（因利差交易），持有12萬億美元資產嘅外國銀行亦陷入去槓桿化，呢D貸款必須用美元進行償付，面對美元減息及經濟正陷入衰退，美元滙價仲咁強，歐羅信心面對考驗。
明年歐洲GDP升幅估計只有0.5％（9月份估計係0.9％）；至於加元同美元利率差距收窄，加元亦面對拋售壓力；英鎊估計明年GDP只有0.6％增長；反之，美元利率只有1.5厘，甚至減至1厘影響亦唔大（因冇人存美元收息）。
周二英國央行認為，英國已進入衰退，上述宣布令英鎊回落2.5％，見1.66美元。
英國股市連續第二天下跌，歐羅跌至兌1.28美元；銅價每磅跌穿2美元，係2005年12月以嚟首次。全球最大鐵礦石生產商Xstrata plc跌9.3%，收971.5便士。
印度孟買SENSEX指數跌4.81%；印尼指數跌4.19%；滬深三百指數跌2.56%；連埃及指數亦跌8.41%；日經平均指數更出現6.79%跌幅，全球股市冇一個上漲。
中信泰富（267）事件到底係單一定係眾多上市企業其中一間？國際貨幣市場大上大落，有幾多上市企業參與外滙買賣？一旦睇錯市損失點計？作為投資者又點樣保護自己利益？一連串問題未獲解答前，恒生指數只有繼續尋底。
美國經濟正步入衰退，每過一天訊號更明顯；比較慶幸係美國唔係出現三十年代式蕭條，而係九十年代式日本衰退，但1990／91年度及2001年軟着陸，兩 者透過減稅及減息可重振，呢次較對上兩次嚴重，因減息及減稅仍起唔到作用。The party really is over. The count down is on.
一位倫敦銀行家話：「The real deterioration in the economy is only just beginning!」企業裁員潮剛開始，估計聖誕節前後先係高峰（香港相信係春節前後）。
中國GDP增長率今年第三季只有9％，明年可唔可以成功保八？成千萬鄉村勞工每年湧入城市，如中國GDP增長率少於8％，已可帶嚟社會唔穩定。
金融海嘯後，金融市場從此唔一樣──吹笛人地位一落千丈，甚至再有人吹笛亦搵唔到咁多細路跟佢走！好似1990年後嘅東京、1997年後嘅香港及2000 年後嘅美國硅谷。甚至重新站起嚟已同過去唔一樣；金融業重返往日情況，即服務其他行業而唔係尋租。1990年開始發展起嚟嘅影子銀行體系將大幅收縮，而唔 係進一步擴大，擔心大部分銀行因此冇咗呢方面嘅利溢來源。
去年相信係信貸擴張周期嘅頂【下圖】，估計今年全球信貸增長率只有7％及明年再下降到5％。根據惠譽估計，不但東歐信貸增長急速放緩，拉丁美洲亦一樣；仲 有中東及非洲，只有南非例外。喺OECD國家中，信貸增長跌幅最大係西班牙及瑞士；擔心冰島、愛爾蘭、丹麥及英國亦加入，後者銀行系統正受到嚴重挑戰。部 分歐羅區國家經濟已陷入衰退，相信明年美國進入機會極大。對嗰D依賴外資流入去保持經濟繁榮嘅國家而言係一項威脅，因外資銀行正全面收緊信貸，例如波羅的 海指數已出現硬着陸。理由係外資銀行要留更多資金喺本土內以應付需求；形成呢次經濟衰退與過去唔同，因加添銀行系統出問題嘅機會（情況好似1990年日 本）。


以冰島為例，2006年2月已被信貸機構列入高危區，家吓已出現嚴重危機；哈薩克情況亦極度唔樂觀，反而俄羅斯情況唔使太擔心。中東嘅卡達已獲其他國家注 資支持。英國、荷蘭、西班牙及澳洲信用已降至BSI嘅B級，依家已冇一個國家仍獲A評級；比利時、愛沙尼亞、盧森堡及拉脫維亞已被降至D級；冰島降至E 級；以色列、波蘭及台灣卻升上C級；多明尼加共和國升上D級。
上述嘅BSI（Banking System Indicator Quality）係由譽惠評估個別銀行而設。三大元素包括私人信貸與GDP關係、外滙情況、股市及地產價格動向與NPL（不再產生收益貸款）比重。被降為 D級者代表體制已好弱，B級仲算安全，C級值得留意。家吓視為最安全嘅銀行系統有奧地利、百慕達、德國、香港、日本及新加坡。作為香港人，切勿庸人自擾 之；香港銀行體系係世界上五大最安全嘅地區之一，地位甚至高出美國、英國同瑞士（即傳統金融中心）。
面對信貸增長率放緩，明年全球陷入衰退機會已高達80％，作為投資者只有耐心等候衰退來臨後先作決定。
根據Eurekahedge Pte嘅資料，因美國政府唔准裸空，令對沖基金指數（包括二千四百三十一隻基金）9月回落7.9％，係2000年該指數成立以嚟最大跌幅月份。
對沖基金由十年前4900億元上升到家吓1.9萬億美元，9月出現呢個跌幅引發唔少基金持有者兌現。
內地銀行體系好穩定
值得慶幸係今天中國嘅銀行體系已好穩定，可媲美大部分OECD國家。不良貸款比率已下降；加上中國唔使依賴外資，因此冇信心危機。大部分國企槓桿比率唔 高；加上中國消費仍在上升（雖然樓價回落及股市回落），因中國人儲蓄率甚高，只有5％中國家庭過度投資喺股市，令股市下跌影響面唔大。估計明年最低潮 時，GDP增長率可能降至7％。
事前好多人未想過去年8月貝爾斯登兩隻對沖基金失敗，可引發今年嘅金融海嘯，主因係環球化環境下，各國之間已冇防火牆，一個致命嘅缺點可擴散成為全球化。 去年8月貝爾斯登對沖基金失敗，代表價值投資法失效，原來皇帝係赤裸裸冇着新衣。呢個事實卻由一個細路仔一語道破，各大臣及尊貴人士唔係睇唔到，而係費事 講。歷史就係由一連串荒謬嘅事件串成，今天亦唔例外。
1997年7月我老曹曾寫過，未來香港物業投資者將面對全新世界。戰後只要有錢買樓及有實力捱過經濟困難期，香港物業最終仍處上升環境；1997年7月嚟 臨後，一切已改變（十一年過咗，今年本港樓價高峰期仍無法超過1997年7月，豪宅除外）。擔心去年起美國物業市場情況好似1997年7月後香港嘅樓價， 因歷史性高位已出現！呢次美國樓價回落唔係另一次調整，而係見頂回落。美國由2006年7月起及英國由去年8月起進入長期樓價回落期。去年10月IMF警 告美國樓價Overpriced 40％；荷銀認為Overpriced 50％；瑞信報道今年年頭至今樓價只回落10％。Capital Economics嘅Seema Shah認為，明年年底前再回落25％；Primemove.Com則估計，喺2012年前回落30％；即未來四年美國同英國樓價仍係向下。
去年起最差嘅投資策略就係「Buy To Let」（買樓收租）。因為英美樓價進入長期下降趨勢。依家租金回報只有3.5厘，樓按利率7厘左右，表面虧損3.5厘，另加每年樓價跌8.5％。
有人問寫字樓又點？家吓倫敦寫字樓回報率4.5厘，情況亦唔妙。Capital Economics估計，喺2010年前回落18％。請遠離英美物業市場係我老曹嘅忠告。
响熊市中，企業宜保持較高流動比率（Current Ratio，亦有人叫Liquidity Ratio或叫Cash To Assets Ratio）。簡單D嚟講，流動資產應係流動負債一點五倍；任何公司流動比率低於一都要小心，各位如要喺淡市投資，宜選嗰D流動比率一點五或以上嘅公司先 好投資，起碼知道佢地唔會破產。
响熊市中損失慘重者，都係嗰D忘記問自己假如自己睇錯市點算嘅人。你會睇錯、我會睇錯、四叔會睇錯、森池兄會睇錯及股聖畢非德亦同樣可以睇錯。睇錯市唔係 千古罪人，自古至今邊個無錯？只要知錯能改，便善莫大焉。我老曹最大優點就係勇於認錯，例如投資方面一旦回落15％，便問自己有冇睇錯？一旦跌20％，便 好肯定係自己睇錯。除止蝕外別無他法。
價值投資法與大趨勢係股市內經常爭拗嘅兩股勢力。例如股價係咪跌至足夠反映未來利淡因素水平？前者係評估機器，後者係投票機器，前者以靜制動，後者永遠衝 動。唔係把股市推向偏高，就係把股價推向偏低；咁樣非常唔理性，最終平衡呢種力量係價值投資者嘅吸納及沽售，只係近年力量此消彼長，相信趁勢嘅人已佔壓倒 性，令價值投資者力量萎縮得好厲害。
繼股神之後，另一超級大戶Jeremy Grantham （GMO主席）認為，美股見底可大手吸納；理由係物有所值。
次按拉近貧富懸殊
今天《信報》短打提及嘅James Cramer，我老曹亦係佢讀者之一，眼見佢由8月15日起不斷估底及叫投資者買銀行股，結果係累人累物；9月30日起改為唔再估底改為睇淡，點知10月份美股又大反彈，連世界著名股評人亦犯咗淡市莫估底戒條，又點怪得普通投資者。
各位仲記得Kirk Kerkorian嗎？今年6月用咗10億美元，大手吸納6.5％福特汽車，至今福特汽車股價下跌60％；佢响周一以每股2.43美元拋售七百三十萬股，另計劃再拋售一億三千三百五十萬股，證明大戶都會睇錯市。
1997年8月至2003年4月係殺中產階級期，唔少中產人士變成負資產；去年11月起呢鋪係殺超級大戶，愈有錢愈死，真係億億聲咁蝕。
估計10月28、29日聯儲局再減息半厘，利率又重返美國大蕭條時期，減息係咪啟示大蕭條重臨？
周二聯儲局宣布，動用5400億美元去購買貨幣市場互惠基金，協助佢地有能力吸納商業票據，代表信貸信心又再出問題？
7月至今銅價跌幅已達50％（其中33％喺最近三十天完成），咁係代表乜嘢？
標普五百指數平均P/E會唔會低過十倍？每一泡沫會不斷擴張直到爆破為止。
投資無涯、唯止蝕是岸。冇止蝕盤嘅投資好似冇腳嘅小鳥（最終累死自己）。今天抵買股份何其多，問題係明年經濟前景未明朗，都係忍手為上策（即最多只可動用全部資金30％）。喺熊市中股市回升25％話都冇咁易，但只有專業投資者先可以捕捉到呢D機會。
對我老曹嚟講，因一向相信太極圖（任何事物皆此消彼長），1982至2007年呢二十五年嘅經濟逐步自由化而創造出嚟嘅財富效應，引發貧富懸殊問題，透過 次按危機又把兩者拉近（過去一年，富人虧損數字肯定較窮人大）。經濟又由一個極端走向另一極端，周而復始。今年起全球政府對經濟嘅管制將由過去二十五年走 向寬鬆，變成重新加強起嚟。雖然自由經濟制度及民主建制長存，只係鐘擺又向另一邊擺動。今年嘅金融制度溶解（Melt Down）已被制止，相信唔會出現三十年代美式大蕭條，但信貸壓碎（Credit Crunch）仍未過去；一籮籮呆壞賬未被清理。投資者嘅貪念已消失，但恐懼未除；全球經濟進入痛定思痛期。過去十八年日本經濟已出現L形貧窮，富者愈富 時代雖然結束，但窮人數字大幅上升形成L形（唔係M形）社會。